«Real» yanvar oyida Mbappega shartnoma taklif qiladi

«Real» joriy yozgi transfer paytida Kilian Mbappening transferi borasida «PSJ» bilan muzokara olib bormoqchi emas.

"Marca" tarqatgan xabarga ko'ra, frantsiyalik futbolchi o'z klubiga maktub yo'llab, amaldagi shartnomani uzaytirmasligini ma'lum qilishi "qaymoqranglilar" uchun kutilmagan voqea bo'lmadi. "Real" voqealarni diqqat bilan kuzatmoqda.

"Qirollik klubi"ning Mbappe borasidagi rejasi quyidagicha: jamoa 2024 yilning yanvar oyida futbolchiga shartnoma taklif qiladi. Agar Kilian bu taklifga rozi bo'lsa, 24 yoshli o'yinchi bilan dastlabki shartnoma imzolanadi. Natijada Mbappe yozda "Real" safiga erkin agent sifatida o'tadi.

Agar Mbappe qishki taklifga darhol javob bermasdan "o'yin" qiladigan bo'lsa, madridliklar undan butunlay voz kechishadi.

Ma'lumotlarga qaraganda, «Real» har qanday holatda ham «PSJ» bilan muzokaraga kirishmoqchi emas.