Maosh sababli Neymarning "Nyukasl"ga o'tishi qiyinlashib bormoqda

"PSJ" hujumchisi Neymar faoliyatini "Nyukasl"da davom ettirishi mumkin, deb xabar bermoqda Relevo nashri.

Manbaga ko'ra, "Nyukasl" Chempionlar ligasida muvaffaqiyatli ishtirok etish uchun tarkibni kuchaytirish niyatida va 31 yoshli braziliyalikning vakillari bilan bog'lanib, ehtimoliy transferni muhokama qilishga ulgurdi.

Shu bilan birga, Neymarning yuqori maosh talabi tufayli ehtimoliy kelishuv murakkabligi qayd etilgan. Shu sababli, muzokaralar hali ilg'or bosqichdan yiroq.

Neymarning "PSJ" bilan amaldagi shartnomasi 2025 yilning yoziga qadar mo'ljallangan. Braziliya terma jamoasi futbolchisi 70 million evroga baholanmoqda. Oldinroq, hujumchiga yana bir da'vogar Londonning “Chelsi” klubi ekani xabar qilingandi.

Neymar joriy mavsum parijliklar safida 29 ta o'yinda maydonga tushib, 18 ta gol urdi va 17 ta golli uzatmani amalga oshirdi.