"Inter" "MYu"ga Lautaro Martinesning narxini ma'lum qildi

"Inter" hujumchi Lautaro Martinesni yozda "Manchester Yunayted"ga sotishga tayyor, deya xabar bermoqda Football Insider nashri.

Milan klubi 25 yoshli argentinalik futbolchi uchun taxminan 70 million funt talab qiladi va ushbu mablag'larni yozda amalga oshirilishi kutilayotgan transferlarga sarflamoqchi.

"Manchester Yunayted" agar "Tottenxem" hujumchisi Xarri Keynni qo'lga kirita olmasa, Lautaro variantini ko'rib chiqmoqda. Londonliklar o'z futbolchisi uchun 100 million funt so'ramoqda, shuning uchun transfer amalga oshmay qolishi mumkin.

"Manchester Yunayted" bosh murabbiyi Erik ten Xag Martinesni o'zining o'yin tizimi uchun ideal hujumchi deb hisoblaydi.

Qayd etilishicha, Lautaroni "Real" va "Arsenal" ham kuzatib bormoqda.

Joriy mavsumda futbolchi klub safida 47 ta o'yinda maydonga tushib, 21 ta gol urdi va 8 ta golli uzatmani amalga oshirdi.