"Lester" yozda yangi hujumchi sotib olmoqchi

"Brentford"ning hujumkor yarim himoyachisi, 23 yoshli Brayan Mbeumo APLning boshqa klubiga o'tishi mumkin.

Todofichajes nashri xabariga ko'ra, futbolchining xizmatlariga "Lester" qiziqish bildirmoqda. Kelishuv yozgi transfer oynasida yakunlanishi mumkin.

Mbeumo 2019 yilning avgustidan beri "Brentford"da o'ynab kelmoqda. Kamerunlik futbolchining “asalarilar” bilan amaldagi shartnomasi muddati 2026 yilning o'rtalariga qadar mo'ljallangan. Transfermarkt portali afrikalik futbolchini 28 million evroga baholagan.

Angliya Premer-ligasining joriy mavsumida Brayan 33 ta o'yinda maydonga tushib, 6 ta gol va 6 ta golli uzatmaga mualliflik qilgan.