APL klubi "Benfika" futbolchisi uchun kurashga qo'shildi

"Benfika" himoyachisi Alexandro Grimaldo "Fulxem" safiga qo'shilishi mumkin.

Sky Sports nashri xabariga ko'ra, "Fulxem" bu yozda mudofaa chizig'ini kuchaytirishni rejalashtirmoqda va 27 yoshli ispaniyalik futbolchining variantini ko'rib chiqmoqda. Mavsum oxirida uning "Benfika" bilan shartnomasi tugaydi va "Fulxem" futbolchini tekinga o'z safiga qo'shib olishi mumkin bo'ladi.

Ayni paytda Grimaldoni "Yuventus", "Milan", "Vilyarreal" va "Valensiya" klublari ham kuzatib borayotgani qayd etilgan. Avvalroq futbolchining o'zi mavsum oralig'ida qaerda bo'lishini bilmasligini aytgandi.

Himoyachi joriy mavsumda barcha turnirlarda 49 ta o'yinda maydonga tushib, 5 ta gol va 14 ta golli uzatmani amalga oshirdi. Transfermarkt portali futbolchining narxini 25 million evroga baholamoqda.