Rossiyalik futbolchiga "Inter" va Bundesliganing uch klubi qiziqish bildirmoqda

Huquqlari “Krasnodar”ga tegishli bo'lgan yarim himoyachi Eduard Spertsyan faoliyatini Evropada davom ettirishi mumkin. 22 yoshli futbolchiga Germaniya Bundesligasining bir qancha klublari qiziqish bildirmoqda.

Metaratings.ru nashri xabariga ko'ra, Spertsyanni “Borussiya” (M), “Bayer” va “Frayburg” klublari o'z safiga qo'shib olmoqchi. Shuningdek, Eduardga A Seriyadan qiziqishlar bor. Yarim himoyachining xizmatlariga Milanning “Inter” klubi qiziqmoqda.

Futbolchining o'zi ham kelasi yozda Evropaning top-5 chempionatlaridagi klublardan biriga o'tishga qaror qilgan.

Rossiya Premer-ligasining joriy mavsumida Spertsyan 21 ta o'yin o'tkazdi. Yarim himoyachi 9 ta gol (3 tasi penaltidan) va 8 ta golli uzatmani amalga oshirdi.