"Nyukasl" Osimxen uchun 100 million to'lashga tayyor edi, biroq "Napoli" bu taklifni rad etdi

Qishki transfer oynasida hujumchi Viktor Osimxen "Napoli"ni tark etib, Angliyaga ko'chib o'tishi mumkin edi.

Sport Witness nashri xabariga ko'ra, nigeriyalik hujumchiga "Nyukasl" qiziqish bildirgan.

Manba bergan xabarga ko'ra, "qarg'alar" Osimxen uchun 100 million evro to'lashga tayyor edi. Biroq A Seriya etakchilari 24 yoshli hujumchini o'z saflarida saqlab qolishga qaror qilishdi.

Viktor Osimxen 2020 yilning kuzidan beri "Napoli"da o'ynamoqda. O'shandan beri nigeriyalik futbolchi neapolliklar safida 82 ta o'yin o'tkazib, 43 ta gol urgan va 13 ta golli uzatmani amalga oshirgan.

Katta ehtimol bilan yozda Viktor Osimxen bilan shartnoma imzolash uchun jiddiy kurash boshlanadi.