Barcha davrlardagi yanvar oyining eng qimmat transferlari (top-10)

Entso Fernandes – 107 million funt (2023)

Ushbu xarid nafaqat yanvardagi eng katta xarid bo'ldi, balki Buyuk Britaniya tarixidagi rekord transferga ham aylandi. "Chelsi"ning bu yurishi "Manchester Siti"ning Jek Grilishga qilgan 100 million funtlik sarmoyasidan ham o'tib ketdi. Shunday qilib, "ko'klar" bir oy davomida jami 330 million funtni transferlarga sarfladi.

Obameyang – 55 million funt (2018)

Obameyang Angliyaga to'purar maqomida etib keladi. Gabonlikning Londondagi to'rt mavsumi 92 ta gol bilan yodimizda qoldi. Ha, u 2022 yilning yanvarida "Arsenal"ni yomon holatda tark etdi. Ammo baribir, muxlislar uni yaxshi xotiralar bilan eslashadi.

Fernando Torres – 50 million funt (2011)

"Chelsi" 2011 yilda Torresni 50 million funt evaziga "Liverpul"dan sotib olib, Britaniyada rekord o'rnatgan edi. Garchand "Chelsi"ga EChLni yutishda katta yordam bergan bo'lsada, Torres London klubida hech qachon o'zining darajasida harakat qila olmadi. U "Chelsi"da 172 ta bahsdan keyin 45 tagina gol urgandi.

Pedro Porro – 37 million funt (2023)

Eng savollar ostida bo'lgan transferlardan biri aynan Porroniki bo'ldi. Ko'p klublar aralashganiga qaramay, Porro "Tottenxem" uchun qaror qilgandi. Qanot himoyachisi Londonga ijarachi sifatida keldi. Ammo "shporlar" uni mavsum so'ngida 37 million funt evaziga sotib olish huquqiga ega.

Endi Kerrol – 35 million funt (2011)

Kerrol Torres o'rniga olib kelingan edi. O'sha paytda 35 million funt rekord summa sifatida qayd etilgan. Ammo uning "Liverpul"dagi sarguzashtlari omadsiz kechdi. Ingliz hujumchisi 58 ta o'yinda 11 ta gol urgan xolos. Kerrol hozir "Reding" sharafini himoya qilmoqda.

Villian – 30 million funt (2013)

"Chelsi" Villianni ukrain klubidan o'sha paytda o'ta qimmat hisoblangan 30 millionga sotib oladi. Uning Londondagi etti yillik faoliyati ajoyib kechdi. "Chelsi"dan keyin u "Arsenal"da harakat qildi. Ayni damda esa Villian Londonning boshqa bir klubi bo'lgan "Fulxem" safida to'p surmoqda.

Andre Shyurrle – 27 million funt (2015)

Bu ro'yxatdagi APLdan sotilgan yagona futbolchi Shyurrle bo'ladi. "Chelsi" nemis futbolchisini o'z yurtiga 27 million funt evaziga qo'yib yuboradi. Shyurrle 2014 yilda Jahon chempioni bo'lgan. Ammo 2020 yilda, 29 yoshida faoliyatini tugatishga majbur bo'ldi.

Xuan Kuadrado – 26 million funt (2015)

Kuadradoning transferi o'ta g'alati ko'chishlardan biri bo'lgan. Garchand 26 millionga sotib olgan bo'lsada, "Chelsi" unga o'zini ko'rsatish uchun imkon bermadi. Atigi 13 ta bahsdan keyin Kuadrado Italiyaga yo'l oldi. Uni 25 million evaziga "Yuventus" xarid qilgandi.

Xamid Traore – 26 million funt (2023)

"Bornmut" transferlarning so'nggi kunida ikkita katta xaridni amalga oshirdi. 24 million evaziga Ilya Zabarniiyni sotib olgach, Traore ham "Sassuolo"dan ijaraga olindi. Xamid, Porro kabi mavsum oxiriga qadar o'ynab ko'radi. Agarda o'zini ko'rsata olsa, u holda 26 millionga doimiy transfer amalga oshiriladi.

Lukas Moura – 24 million funt (2018)

Moura hali ham "Tottenxem" safida harakat qiladi. Jamoa muxlislari braziliyalikning "shporlar"ni 2019 yilgi EChL finaliga olib chiqqan xet-trigini hech qachon unutmaydi. Biroq, Antonio Konte hujumchini chetga surib qo'ydi. Maura 139 ta o'yinda faqat 19 ta gol urishga erishgan xolos.

ISMATOV J.