Entso Fernandesning "Chelsi"ga o'tishidan "River Pleyt" kattagina mablag' oladi

Lissabonning "Benfika" klubi argentinalik yarim himoyachi Entso Fernandesning "Chelsi"ga o'tishi tafsilotlarini oshkor qildi.

"Burgutlar"ning ma'lumotlariga ko'ra, transfer 121 million evro va bonus to'lovlarini tashkil qilgan. Ushbu transferning 25 foizi futbolchini tarbiyalagan "River Pleyt"ga tushadi.

Fernandesning "Chelsi" bilan shartnomasi 2031 yilning o'rtalariga qadar tuzilgan.

Entso o'tgan yozdan beri "Benfika"da o'ynab kelayotgandi. Joriy mavsumning birinchi yarmida u 29 ta uchrashuvda ishtirok etib, 4 ta gol va 7 ta golli uzatmaga mualliflik qilgan.

Eslatib o'tamiz, Fernandes 2022 yilgi jahon chempionatining eng yaxshi yosh futbolchisi deb tan olingandi.