"Ayaks"ning ganalik futbolchisi APLda o'ynamoqchi

Amsterdamning "Ayaks" klubi yarim himoyachisi Muhammad Kudus klubini o'zgartirishni intiqlik bilan kutmoqda. Insayder David Ornshteynning so'zlariga ko'ra, ganalik futbolchi yanvar oyidagi transfer oynasidayoq Amsterdamni tark etmoqchi.

Futbolchiga da'vogarlar orasida Angliya Premer-ligasi, Frantsiya 1-ligasi va Germaniya Bundesligasi klublari bor. Qudusning o'zi Tumanli Albionda o'ynashni xohlamoqda.

Ushbu jahon chempionatida Qudus yaxshi taassurot qoldirdi va guruh bosqichining uchta o'yinida Gana terma jamoasi safida ikkita gol urdi.

Avvalroq, "Ayaks" futbolchini 40-50 million evro evaziga qo'yib yuborishga tayyor ekani xabar qilingandi. Uning amsterdamliklar bilan shartnomasi 2025 yilning yoziga qadar mo'ljallangan.