"Chelsi" va "Ayaks"ning Alvares borasidagi muzokarasi to'xtab qoldi

"Chelsi" va "Ayaks" yarim himoyachi Edson Alvaresni transferi borasida muzokaralar olib borayotgandi.

Sky Sports nashrining yozishicha, Amsterdam klubi braziliyalik vinger Antoni "Manchester Yunayted"ga ketganidan keyin yana bir futbolchisini yo'qotmoqchi emas.

Manbalarga ko'ra, "Ayaks" rahbariyati Alvaresga qolish kerakligini aytgan. Shu bilan birga, futbolchining o'zi ham London klubiga o'tishini talab qilmoqda va shu sabab jamoasining so'nggi mashg'ulotlarini o'tkazib yubordi. Avvalroq "ko'klar" meksikalik futbolchi uchun "Ayaks"ga taxminan 50 million evro taklif qilishgandi. Ayni paytda "Ayaks" klubi transfer bo'yicha hozircha aniq javob bermagan. Eslatib o'tamiz, Niderlandiyada transfer oynasi kecha yopilgandi.

24 yoshli Alvares Amsterdam klubiga 2019 yilning iyul oyida 15 million evro evaziga kelib qo'shilgan edi. Yarim himoyachi jamoa uchun 107ta o'yinda 9ta gol urdi va 5ta golli uzatmani amalga oshirdi. Tomonlar o'rtasidagi kelishuv 2025 yilda yakuniga etadi.