"MYu" Antoni uchun qancha mablag' sarf qilayotgani ma'lum bo'ldi

"Manchester Yunayted" Antonining transferi uchun "Ayaks"ga to'laydigan summa 100 million evrodan oshishi mumkin, deya xabar beradi jurnalist Mayk Vervey.

Manbaga ko'ra, Amsterdam klubi 22 yoshli braziliyalikni sotishdan turli bonuslarni hisobga olgan holda 102 million evro ishlab olishi mumkin.

Oldinroq futbolchi "mankunianliklar" bilan yana bir mavsumga uzaytirish imkoniyati bilan 2027 yilgacha hisoblangan besh yillik shartnoma imzolashi haqida xabar berilgandi.

Antoni joriy mavsumda "Ayaks" tarkibida 3 ta o'yinda maydonga tushib, 2 ta gol urdi va 2 ta golli uzatmani amalga oshirdi.

Transfermarkt portali Braziliya terma jamoasi futbolchisini 35 million evroga baholamoqda.