"MYu" 35 million evroli hujumchi sotib olmoqchi

"Manchester Yunayted" skautlari jamoaning hujum chizig'ini kuchaytira oladigan futbolchilarni izlashda davom etishmoqda.

Jurnalist Nikolo Skiraning ma'lum bo'lishicha, "Uotford"ning braziliyalik hujumchisi Xuan Pedro "qizil iblislar"ning transferlar ro'yxatiga kiritilgan. "Mankunianliklar" uning uchun 35 million evro to'lashga tayyor.

Oldinroq hujumchi xizmatiga APLning yana bir vakili "Nyukasl" qiziqish bildirayotgani haqida xabar berilgandi.

"Uotford" bu mavsum Chempionshipda o'ynamoqda. Pedro to'rtta uchrashuvda qatnashib, bitta gol urdi.

Eslatib o'tamiz, ushbu yozda "Manchester Yunayted" portugaliyalik Krishtianu Ronalduni yo'qotish xavfi ostida turibdi. 37 yoshli hujumchi Chempionlar ligasida o'ynaydigan jamoaga o'tmoqchi.