"Milan" o'z futbolchisi borasida hech qanday taklif olmagani ma'lum bo'ldi

"Milan" yarim himoyachisi Sandro Tonali ushbu transfer oynasida o'z jamoasini tark etmaydi.

Londonning "Arsenal" klubiga o'tishi mumkinligi haqidagi mish-mishlardan farqli o'laroq, "rossonerlar" o'z yarim himoyachisini qo'yib yuborish niyatida emaslar, bundan tashqari, ular hech qanday rasmiy transfer taklif ham olmagan. Bu haqda Football Italia xabar bermoqda.

Eslatib o'tamiz, kecha "Milan" Tonalini 55 million evroga sotishga tayyorligi haqida xabarlar tarqalgan edi. Biroq manbaning aytishicha, bu xabar haqiqat emas.

Tonali o'tgan mavsumda Italiya A Seriyasida beshta gol urdi va o'z klubiga 11 yil ichida birinchi Skudettoni qo'lga kiritishiga yordam berdi. Futbolchi 2020 yilda "Breshiya"dan "rossonerlar" safiga qo'shilgan edi.