Nufuzli Transfermarkt portali futbolchilarning transfer baholarini yangiladi. Ushbu yangilanishdan so'ng Vetnamning Znews.vn nashri Osiyo qit'asining ayni damdagi eng qimmatbaho futbolchilari ro'yxatini tuzib chiqdi. Quvonarlisi, mazkur reytingni hamyurtimiz Abduqodir Husanov boshqarib bormoqda.

Abduqodir Husanov — Osiyo futbolining yangi qiroli

O'zbekiston milliy terma jamoasi himoyachisi Abduqodir Husanov hozirda nafaqat yurtimizda, balki butun qit'ada eng yuqori baholanayotgan futbolchi bo'lib turibdi. "Manchester Siti" safida ishonchli o'yin namoyish etayotgan va Pep Gvardiolaning ishonchini qozongan Husanovning transfer qiymati 35 million evroga etdi. Uning tezkorligi va himoyadagi "aqlli" o'yini Evropa nashrlari diqqat markazida bo'lib turibdi.

Kuchli uchlik: Yapon yulduzlari ta'qibda

Reytingning ikkinchi pog'onasini "Real Sosedad" vakili Takefuso Kubo egallab turibdi. Yapon vingeri ayni damda 30 million evroga baholanmoqda. Kuchli uchlikni esa Germaniyaning "Maynts 05" klubida to'p surayotgan Kayshu Sano yakunlab bergan. Uning transfer bahosi 25 million evroni tashkil etadi.

Reytingning qolgan qismi quyidagicha ko'rinish olgan:

  • Li Kan In (Janubiy Koreya, "PSJ") — 25 mln evro;

  • Kaoru Mitoma (Yaponiya, "Brayton") — 25 mln evro;

  • Kim Min Je (Janubiy Koreya, "Bavariya") — 25 mln evro;

  • Ritsu Doan (Yaponiya, "Ayntraxt F") — 25 mln evro;

  • Tsion Suzuki (Yaponiya, "Parma") — 20 mln evro.

Mutaxassislarning ta'kidlashicha, Abduqodir Husanovning bunday yuqori ko'rsatkich bilan peshqadamlik qilishi o'zbek futbolining jahon arenasidagi nufuzi ortib borayotganidan dalolat beradi. 22 yoshli himoyachimiz nafaqat Osiyoning eng qimmat futbolchisi, balki Evropaning eng istiqbolli himoyachilaridan biri sifatida e'tirof etilmoqda.