"Manchester Siti" hujumchisi Erling Xoland Chempionlar Ligasida aql bovar qilmas sermahsullik namoyish etishda davom etmoqda.

Chorshanba kuni norvegiyalik futbolchi "Monako"ga qarshi o'yinda (2:2) dubl qayd etdi. Endi 25 yoshli hujumchining hisobida turnirning 50 ta uchrashuvida 52 ta gol bor - bu barcha davrlarning eng yaxshi to'purarlari ro'yxatida to'qqizinchi o'rin. Shu bilan birga, e'tiborlisi, Xoland bir o'yindagi o'rtacha gollar soni bo'yicha peshqadamlik qilmoqda - 1,04 (gollar soni bo'yicha top-50 likka kiruvchi futbolchilar orasida). Ikkinchi o'rinni Gerd Myuller (0,97), uchinchi o'rinni Ferents Pushkash (0,88) egalladi.

Chempionlar ligasi tarixida eng ko'p gol urgan Krishtianu Ronaldu gollar nisbati bo'yicha bor-yo'g'i sakkizinchi o'rinda - 0,77. Ettinchi pog'onada Robert Levandovski (0,78), oltinchi o'rinda Lionel Messi (0,79) qayd etilgan. Uchalasi ham Alfredo di Stefano (0,84) va Joze Altafinidan (0,86) ortda qolmoqda.