Madridning «Atletiko» klubi himoyachisi Markos Lorente eng qiyin raqiblari haqida to'xtalib o'tdi. Ispaniyalik futbolchi o'z fikrini bildirar ekan, «Real» va «Barselona» yulduzlari — Vinisius Junior va Lamin Yamal o'rtasida taqqoslash o'tkazdi.

«Vinisiusga qarshi o'ynaganda, men vaziyatni kammi-ko'pmi nazorat qila olaman. Ammo Lamin bilan bog'liq vaziyatda qiyinchiliklarga duch kelganman. To'g'risini aytsam, hech qaysi vinger menga bunchalik muammo tug'dirmagan. Ba'zida maydonda Yamalni ko'rib: «Yaxshiyamki, unga qarshi o'ynashimga to'g'ri kelmayapti», deb o'ylab qolaman. U mening qanotimda o'ynamaydi, lekin menimcha, agar u mening bevosita raqibim bo'lganida, menga juda qiyin bo'lardi», — deya 31 yoshli futbolchining so'zlarini keltiradi Sport nashri.

Yaqinda «Atletiko» Madrid derbisida «Real»ga imkoniyatni boy berdi (2:3). La Liganing navbatdagi turida Diego Simeone shogirdlari «Barselona»ga qarshi bahs olib borishadi — uchrashuv 4 aprel kuni bo'lib o'tadi.