Vinisius XXI asrda "Real" tarkibida 10 dan ortiq penalti tepgan futbolchilar orasida eng yomon ko'rsatkichga ega bo'lib turibdi.

Braziliyalik futbolchi Chempionlar ligasi 1/8 finali doirasidagi "Manchester Siti"ga qarshi o'yinda (3:0) nuqtadan darvozani ishg'ol eta olmadi. Uning zarbasini Djanluidji Donnarumma qaytardi.

Bu Vinisiusning "qaymoqranglilar" libosidagi 14-penaltisi va 4-xatosi bo'ldi — aniqlik ko'rsatkichi 71,4 foiz. So'nggi ettita urinishdan faqat uchtasi gol bilan yakunlangan.

2000/01 yilgi mavsumdan beri "Real"ning etti nafar futbolchisi kamida o'ntadan penalti tepgan. Eng aniq zarba beruvchi Serxio Ramos bo'lib chiqdi — 22 ta gol va bitta xato (95,6 foiz). Keyingi o'rinda Krishtianu Ronaldu bormoqda — 13 ta xato va 79 ta gol (87,7 foiz). Karim Benzema kuchli uchlikni yakunlab beradi — 5 ta xato va 32 ta gol (86,4 foiz).

Shuningdek, kuchli ettilikdan Luish Figu (6 ta xato / 31 ta gol, 83,7 foiz), Kilian Mbappe (4 ta xato / 19 ta gol, 82,6 foiz) va Rud van Nistelroy (4 ta xato / 11 ta gol, 73,3 foiz) joy olgan.