Londonning «Arsenal» klubi sobiq o'yinchisi Jek Uilshir «Luton Taun» boshqaruvida o'zining ilk sovrinini qo'lga kiritdi. 2022 yilda futbolchilik faoliyatini yakunlagan Uilshir murabbiylik faoliyatini boshladi — dastlab o'zi ilgari to'p surgan «Arsenal»ning yoshlar jamoasida ishladi. Ammo ko'p o'tmay, unga jiddiyroq takliflar tusha boshladi va 2024 yilda «Norvich» klubiga o'tdi.

O'tgan yili esa u «kanareykalar»ni ingliz futbolining uchinchi divizionida ishtirok etayotgan «Luton Taun»ga almashtirdi. O'tgan dam olish kunlarida uning klubi finalda «Stokport Kaunti»ni 3:1 hisobida mag'lub etib, ilk sovrin — EFL Trophy kubogiga ega chiqdi.

Endi jamoa oldida boshqa vazifa turibdi — oradagi olti ochkolik farqni yo'qqa chiqarish va Chempionshipga yo'llanma beruvchi pley-off bosqichiga yo'l olish.