Italiyaning «Milan» klubi himoyachisi Straxinya Pavlovich bosh murabbiy Massimiliano Allegrining uslubi o'ziga xos jihatlari nimada ekanligiga to'xtaldi. Futbolchining so'zlariga ko'ra, mutaxassis mayda detallarga juda e'tiborli.

«U — taktik daho. Allegri futbolchilarni maydonda to'g'ri joylashtirish va himoyalanish vaqtida ular orasidagi masofani to'g'ri belgilashni juda yaxshi biladi. Mana shu kichik detallar katta farqni yuzaga keltiradi. Bu jihatlarni talqin qilishda u eng yaxshisidir», — deya Pavlovichning so'zlarini keltiradi pianetamilan.it.

Eslatib o'tamiz, Massimiliano Allegri o'tgan yilning yozida «Milan» boshqaruvini qo'lga olgan edi. Avvalroq mutaxassis o'tgan o'n yillikning birinchi yarmida ham ushbu klubda faoliyat yuritgan.