Madridning «Atletiko» klubi Diego Simeone boshqaruvi davrida uchinchi bor «Barselona»ni Chempionlar ligasidan chiqarib yubordi.

«Matraschilar» 2014 va 2016 yillardagi chorak finallarda ham «ko'k-anorranglilar»ni musobaqadan chiqarib yuborishgan edi – o'sha mavsumlarda Madrid jamoasi finalgacha etib borib, har ikki safar ham «Real»ga imkoniyatni boy bergan. Joriy mavsumda ham «Barsa» yana 1/4 final bosqichida mag'lub etildi.

«Barselona»ni Chempionlar ligasidan uch marta chiqarib yuborish — oson ish emas. Biz Lionel Messi va Lamin Yamal davridagi «Barselona» haqida gapiryapmiz», — dedi 2011 yil oxiridan beri o'z lavozimida ishlab kelayotgan Simeone o'yindan keyingi intervyusida.