Niderlandiyada pasportini o'g'irlatib qo'ygan «Lans» va Saudiya Arabistoni terma jamoasi himoyachisi Saud Abdulhamid hujjatlarini tiklashga muvaffaq bo'ldi va tez orada milliy jamoa ixtiyoriga etib keladi.

«Saud Abdulhamid hujjatlarni olish bilan bog'liq barcha zarur jarayonlarni yakunlab, payshanba kuni «yashil burgutlar» qarorgohiga qo'shiladi», — deb xabar bermoqda Saudiya Arabistoni futbol federatsiyasi (SAFF) matbuot xizmati.

Avvalroq, futbolchi Amsterdamda pasporti o'g'irlangani sababli terma jamoa yig'iniga o'z vaqtida etib kela olmagan edi. To'yga ketayotgan vaqtida noma'lum shaxslar o'yinchining avtomobilini buzib ochib, shaxsiy buyumlarini o'g'irlab ketishgan. Federatsiya barcha masalalar hal etilganini va himoyachi payshanba kuni jamoaga qo'shilishini ma'lum qildi.

Yakunlangan mavsumda Abdulhamid «Lans» safida 31 ta o'yinda maydonga tushib, 3 ta gol urdi va 8 ta golli uzatmani amalga oshirdi.