Portugaliya terma jamoasi bosh murabbiyi Roberto Martines JCh-2026 guruh bosqichining 2-turidan o'rin olgan O'zbekistonga qarshi uchrashuv oldidan o'z fikrlari bilan o'rtoqlashdi. Mutaxassisning aytishicha, jamoa dastlabki turdagi muvaffaqiyatsizlikdan to'g'ri xulosa chiqargan va tanqidlarni chetga surib qo'ygan.

“Biz e'tiborni faqat o'zimizga qaratganmiz va jamoamiz har qachongidan ham kuchliroq. Jahon chempionatida ishtirok etyapmiz, albatta, atrofda shovqin, bosim bo'lishi tabiiy. Bu o'yinning bir qismi hisoblanadi. Biz O'zbekistonga qarshi bo'ladigan uchrashuvga yaxshi tayyorlandik va guruhimiz hozir avvalgidan ham jipslashgan”.

Kongo bilan o'yindagi xatolar O'zbekistonga qarshi takrorlanmaydi

Murabbiy ilk turdagi durangni (1:1) eslar ekan, shogirdlari dastlabki 20 daqiqadan so'ng intizom va strukturani yo'qotib qo'yganini ta'kidladi:

“Biz bor e'tiborimizni keyingi o'yinga qaratganmiz. Qoniqarsiz natijadan so'ng tanqid bo'lishi oddiy holat, biroq bu narsalar bizning tayyorgarlik jarayonimizga ta'sir qilmaydi. Umid qilamanki, ertaga [O'zbekistonga qarshi] jamoamiz to'liq 90 daqiqa davomida o'z darajasida harakat qilishga tayyor bo'ladi”.

Guruhdagi vaziyat va g'alabaning ahamiyati haqida

Kolumbiya o'zining dastlabki o'yinida O'zbekistonni 3:1 hisobida mag'lub etib, K guruhida peshqadamga aylanib olgani inobatga olinsa, Portugaliya uchun ham bu uchrashuvdagi g'alaba pley-offga chiqish yo'lida juda muhim ahamiyat kasb etadi.
Bu haqida jamoa himoyachisi Joau Kanselu ham alohida to'xtalib o'tdi:

“Kongo bilan o'yinda etarlicha vaziyatlar yarata olmadik, bu biz kabi sifatli o'yinchilarga ega jamoa uchun xos emas. Tarkibimizda dunyoning eng yaxshi o'yinchilari yig'ilgan va biz buni maydonda isbotlashimiz kerak. O'zbekistonga qarshi faqat g'alaba qozonishimiz shart. Endi xato qilishga haqqimiz yo'q”, dedi Kanselu.

Ma'lumot o'rnida eslatib o'tamiz, O'zbekiston hamda Portugaliya terma jamoalari o'rtasidagi JCh—2026 guruh bosqichining 2-tur bahsi 23 iyun kuni bo'lib o'tadi. Uchrashuv Toshkent vaqti bilan soat 22:00 da boshlanishi belgilangan. O'yin Hyustondagi “NRG” stadionida bo'lib o'tadi.

Manba: Stadion.uz