Urugvay terma jamoasi bosh murabbiyi Marselo Belsa yarim himoyachi Federiko Valverdening kuchli tomonlari haqida o'z fikrlari bilan o'rtoqlashdi.

27 yoshli futbolchi muntazam ravishda gol urishni boshladi — uning Madridning «Real» klubi va milliy terma jamoa safidagi oxirgi 7 ta o'yinida 7 ta goli bor.

«Valverde o'z pozitsiyasidagi barcha futbolchilardan farq qiladi. U yarim himoyaning istalgan nuqtasida o'ynay oladi, himoyaning o'ng qanotida tajribaga ega, so'nggi vaqtlarda esa hujum qanotida o'ynab hammaning e'tiborini tortdi. Odatda u o'ng qanotdan xavf soladi, lekin biz uning chap qanot bo'ylab yorib kirishlarini ham ko'rganmiz. Hatto Pedri va Vitinya kabi o'yinchilar ham Fededagi kabi ko'p qirralilikka ega emas — aynan shu xususiyat uni boshqalardan ajratib turadi. Shubhasiz, u dunyoning eng yaxshi futbolchilari qatoriga kiradi», — dedi Belsa matbuot anjumanida.

Eslatib o'tamiz, seshanba kuni urugvayliklar Jazoir terma jamoasi bilan durang o'ynashdi (0:0).