Frantsiyalik hujumchi Kristofer Nkunku Saudiya Arabistoni chempionati klublari orasida xaridorgir. Bu haqda jurnalist Antonio Vitello xabar bermoqda.

Manbaning ma'lum qilishicha, hujumchiga bir nechta takliflar bo'lgan, biroq u rad javobini bergan. Ayni damda frantsuz Yaqin Sharqdagi transferga qiziqish bildirmayapti. Kristofer faoliyatini milanliklar safida davom ettirmoqchi.

Nkunkuning transfer narxi 32 million evroni tashkil etadi. U "rossonerilar" bilan 2030 yilning yarmigacha mo'ljallangan shartnomaga ega.

Hujumchi joriy mavsum "Milan" safida 14 ta bahsda maydonga tushib, 1 ta gol va 2 ta golli uzatma muallifi bo'ldi.