"Manchester Yunayted" yarim himoyachisi Brunu Fernandesh bir mavsumda APLda amalga oshirilgan golli uzatmalar soni bo'yicha klub tarixida uchinchi o'ringa ko'tarilib oldi.

Portugaliyalik futbolchi Angliya chempionatining 28-turi doirasida "Kristal Pelas"ga qarshi kechgan o'yinda (2:1) Benyamin Sheshkoga golli pas etkazib berdi.

Hozirda Brunu hisobida APL joriy mavsumining 25 ta o'yinida 13 ta assist mavjud — "MYu"ning biror bir o'yinchisi 2011/12 yilgi mavsumdagi Antonio Valensiyadan beri bunday natijaga erisha olmagan edi. Premer-liganing bitta mavsumida "MYu" tarkibida faqat Nani (2010/11 yilgi mavsumda 17 ta assist) va Devid Bekxem (1999/00 yilgi mavsumda 16 ta uzatma) ko'proq golli pas berishgan.

Brunu APL joriy mavsumining eng yaxshi assistenti bo'lib turibdi. Uning eng yaqin ta'qibchilari — "Manchester Siti" a'zolari Erling Xoland va Rayan Sherki hisobida 7 tadan golli uzatma bor.