Myunxenning «Bavariya» klubi yarim himoyachisi Maykl Olise joriy yozda Madridning «Real» jamoasiga o'tish imkoniyatini ko'rib chiqmoqda, deb xabar bermoqda Sports.kz Bild nashriga tayanib.

Manbaga ko'ra, 24 yoshli frantsuz futbolchisi 2026 yilgi jahon chempionati vaqtida Frantsiya milliy jamoasidagi sheriklariga faoliyatini Ispaniya grandi safida davom ettirish istagi borligini ma'lum qilgan. Ehtimoliy transferda Frantsiya terma jamoasi sardori va «Real» hujumchisi Kilian Mbappe ham faol ishtirok etgan.

Qayd etilishicha, Mbappe Olise bilan Madridda birga o'ynash istiqbollari haqida bir necha bor suhbatlashgan. U jamoadoshiga maydonda qanchalik samarali hamkorlik qilishlari mumkinligini tushuntirib, «Real» aynan shunday sifatlarga ega futbolchiga ehtiyoj sezayotganini ta'kidlagan. Shuningdek, Mbappe Ispaniya poytaxtidagi hayot haqida ham ijobiy fikrlar bildirgan.

Manba ma'lumotiga ko'ra, ushbu suhbatlardan keyin Mbappe «Real» prezidenti Florentino Peresga Maykl Oliseni joriy yozda madridliklar safiga qo'shilishga ko'ndirishga muvaffaq bo'lganini aytgan.

Manba: Stadion.uz