2026 yilgi Jahon chempionatidan so'ng Dide Desham Frantsiya terma jamoasi bosh murabbiyi lavozimini tark etadi. Deyarli besh yildan beri murabbiylik qilmayotgan Zinedin Zidan «uch ranglilar»ning yangi ustoziga aylanishi haqida gap-so'zlar yuribdi. Frantsiya terma jamoasining yulduzli hujumchisi Kilian Mbappe ushbu mavzuda o'z fikrini bildirdi.

«Prezident va federatsiya — muddatlarni nazorat qiluvchi organlardir. Yangi murabbiyning ismi qachon e'lon qilinishini ular hal qilishadi. U kim bo'lishini vaqt ko'rsatadi, men bilmayman (kulimsirab)», — deya Mbappening so'zlaridan iqtibos keltirmoqda The Touchline.

Dide Desham Frantsiya terma jamoasini 2012 yilning iyul oyida boshqarishni boshlagan edi. 2018 yilda «uch ranglilar» Rossiyada bo'lib o'tgan Jahon chempionatida g'olib chiqishgan.