Madridning «Real» klubi va Frantsiya terma jamoasi markaziy hujumchisi Kilian Mbappe yozda bo'lib o'tadigan Jahon chempionatidan kutayotgan umidlari bilan o'rtoqlashdi.

«Biz Jahon chempionatida ishtirok etish nimani anglatishini bilamiz — bu juda qiyin. Biz ulkan hissiy bosimni his qilyapmiz. Butun mamlakatning umidi bizning elkamizda ekanligini tushunib turibmiz. Biz 67 milliondan ortiq frantsuzlar uchun maydonga tushamiz», — deya hujumchining so'zlarini keltiradi FOX Deportes.

Mbappe, shuningdek, Frantsiya terma jamoasi mundialga xotirjamlik bilan va chempionlik kubogini qo'lga kiritish niyatida yaqinlashayotganini qo'shimcha qildi.

JCh-2026 guruh bosqichida Dide Desham shogirdlari Norvegiya va Senegal terma jamoalariga qarshi bahs olib borishadi. Frantsuzlarning uchinchi raqibi Iroq va Boliviya o'rtasidagi o'tish o'yini natijasiga ko'ra aniqlanadi.