NBAning olti karra chempioni Maykl Jordan «Manchester Siti»ning sobiq bosh murabbiyi Xosep Gvardiola uchun videomurojaat yozib qoldirdi. Ushbu video ispaniyalik murabbiyni kuzatish marosimida namoyish etildi.

«Hey Pep, bu men — Maykl Jordan. Senga mana shunday aql bovar qilmas faoliyat uchun tabrik yo'llamoqchiman. Hordiqdan zavqlan. Golf maydonida omad yor bo'lsin. To'pni doim to'g'ri yo'nalishda ur. Tabriklayman», — dedi 63 yoshli amerikalik afsona.

Gvardiola «Siti» boshqaruvidagi o'n yillik faoliyatidan so'ng jamoani tark etmoqda. U ushbu davr mobaynida jamoa bilan 17 ta nufuzli sovrinni qo'lga kiritdi.

Hozirda Gvardiola 55 yoshda. U 2016 yilning 1 iyulidan buyon «Siti»da ishlab kelayotgan edi. Bungacha esa «Bavariya» va «Barselona» klublarini boshqargan.