«Manchester Siti» ustozi Xosep Gvardiola chempionlik uchun «Arsenal» bilan kechayotgan kurash haqidagi odatiy savolga javob berdi.

Chorshanba kuni «shaharliklar» o'z maydonlarida «Nottingem Forest»ni mag'lub eta olishmadi (2:2), «to'pchilar» esa parallel kechgan bahsda «Brayton»dan ustun kelishdi (1:0). Natijada «Siti»ning londonliklardan ortda qolishi 7 ochkogacha ko'paydi (Gvardiola jamoasida bitta zaxira o'yini mavjud).

O'yindan so'ng jurnalistlar Gvardioladan jamoasining «Arsenal»ni quvib o'tishiga yordam beradigan «kutilmagan burilishlar»ga ishonish-ishonmasligi haqida so'rashdi: «Oldinda hali o'yinlar ko'p, shuning uchun biz shunchaki kurashishda davom etishimiz kerak», — deb javob berdi ispaniyalik mutaxassis TNT Sports telekanaliga bergan intervyusida.

Shanba kuni «Manchester Siti» Angliya Kubogi doirasida «Nyukasl»ga qarshi maydonga tushadi.