Germaniya terma jamoasining sobiq afsonaviy futbolchisi Lotar Matteus Frantsiya milliy terma jamoasi va «Bavariya» klubi hujumkor yarim himoyachisi Maykl Olisening JCh-2026’dagi imkoniyatlari va istiqbollari haqida yuqori fikrlar bildirdi. Bu haqda Bild nashri xabar bermoqda.

«Mbappe — gol urish borasida haqiqiy «mashina». Biroq, menga nazarimda, Olise ushbu mundialda Kilianni soyada qoldirib ketishi mumkin. Maykl nafaqat gol urishni biladi, balki maydonda haqiqiy sehr ko'rsata oladi. Agar u Jahon chempionatining eng yaxshi futbolchisi deb topilib, «Oltin to'p» sovrinini qo'lga kiritsa, bundan aslo hayratlanmayman», — deya Matteusning so'zlarini keltirmoqda matbuot.

Ma'lumot uchun, ayni damda 24 yoshli Maykl Olisening transfer qiymati nufuzli portallar tomonidan 150 million evroga baholanmoqda va u dunyoning eng qimmatbaho futbolchilaridan biri hisoblanadi.

Eslatib o'tamiz, Jahon chempionati—2026 guruh bosqichida Dide Desham boshchiligidagi Frantsiya terma jamoasi Senegal, Norvegiya va Iroq terma jamoalariga qarshi bahs olib boradi.