"Barselona" hujumchisi Lamin Yamal Ispaniya chempioniga aylangach, Madridning "Real" klubi yarim himoyachisi Jud Bellingemning o'tgan yilgi gaplarini yodga oldi.

Voqealar rivoji o'tgan yilning kuzida boshlangan edi. O'shanda Lamin Yamal "El-Klasiko" oldidan bir qator provokatsion bayonotlar bergan, ammo uchrashuvda "Real" 2:1 hisobida g'alaba qozongan va Yamal kuchsiz o'yin ko'rsatgan edi.

O'yindan so'ng Bellingem ijtimoiy tarmoqlarda Yamalning bayonotlariga ishora qilib: "So'zlarning hech qanday qiymati yo'q", — deb yozib qoldirgan edi.

Joriy mavsumning ikkinchi davrasida esa "Barselona" "Real"ni 2:0 hisobida mag'lub etib, Ispaniya chempionligini rasmiylashtirdi. Lamin Yamal jarohati sababli ushbu bahsda maydonga tusha olmagan bo'lsa-da, stadionda jamoasi bilan birga edi.

G'alabaning ertasiga Yamal jamoadoshlarining golni nishonlayotgani aks etgan suratni joylashtirib, Bellingemning iqtibosini so'zma-so'z takrorladi: "So'zlarning hech qanday qiymati yo'q".

Shuningdek, futbolchi o'z postiga ko'plab kulgi va ko'z yoshi ifodalarini qo'shib qo'ygan. Mutaxassislar buni yosh yulduzning madridliklarga nisbatan o'ziga xos "revanshi" sifatida baholashmoqda.