"Real" va Germaniya terma jamoasi sobiq yarim himoyachisi Toni Kroos "Bavariya" posboni Manuel Noyerning mahoratiga yuqori baho berdi.

"Men uchun Manu barcha davrlarning eng yaxshi darvozaboni ekani — fakt. U o'yinini tomosha qilish juda qiziq bo'lgan yagona golkiperdir. Uning maydondagi harakatlari shunchaki hayratlanarli. Noyer hali ham o'zining noyob o'yin uslubiga ega va bu faqat unga xos", — dedi Kroos Einfach mal Luppen podkasti efirida.

Shuningdek, Kroos Noyer uyda o'tgan Evro-2024dan keyin tark etgan Germaniya terma jamoasiga qaytish masalasini ko'tarmaslik uchun etarlicha aqlli ekanini ta'kidladi.

"Shunga qaramay, u shubhasiz eng yaxshi nemis darvozaboni. Bu bilan bahslashib bo'lmaydi va unga hech qanday dalillarning keragi yo'q", — deya qo'shimcha qildi Kroos.

Eslatib o'tamiz, avvalroq 40 yoshli Noyer Chempionlar ligasida haftaning eng yaxshi futbolchisi deb topilgan edi. Joriy 2025/26 yilgi mavsumda darvozabon barcha turnirlarda 31 ta o'yin o'tkazib, 30 ta gol o'tkazib yubordi va 10 ta bahsda o'z darvozasi daxlsizligini saqlab qoldi.