«Bavariya» bosh murabbiyi Vensan Kompani 2026 yilgi jahon chempionatida ekspert sifatida ishlash taklifini rad etdi.

«Hech qachon! Nima uchun ta'tilim vaqtida bu ishni qilishim kerak? U holda keyingi mavsumda Myunxenda oilam bo'lmaydi (oilamdan ajrab qolaman). Bunga hech qanday imkoniyat yo'q», — deya Kompanining so'zlaridan iqtibos keltirmoqda jurnalist Fabritsio Romano.

Kompani 2024 yil yozida «Bavariya» bosh murabbiyi etib tayinlangan edi. Avvalroq myunxenliklar muddatidan oldin Germaniya chempioniga aylanib, ketma-ket ikkinchi bor ushbu sovrinni qo'lga kiritishgandi. 2026 yilgi jahon chempionati shu yozda AQSh, Kanada va Meksikada bo'lib o'tadi. Kompanining vatani — Belgiya terma jamoasi «G» guruhida Misr, Eron va Yangi Zelandiya bilan kurash olib boradi.