Engil vazn toifasida UFC chempioni Iliya Topuriya navbatdagi jangini qachon o'tkazishi va kimga qarshi oktagonga chiqishi mumkinligi borasida fikr bildirdi.

“El Matador”ning so'zlariga ko'ra, u taxminan uch oydan so'ng janglarga qaytishni rejalashtirmoqda. Topuriya o'zining navbatdagi raqibi sifatida amerikalik Jastin Getji va britaniyalik Peddi Pimblett o'rtasidagi bahs g'olibini ko'rmoqda. Mazkur jangda vaqtinchalik chempionlik kamari o'ynaladi.

“Aprel — iyun. Peddi Pimblett va Jastin Getji o'rtasidagi jang g'olibi”, deb yozdi Topuriya o'zining ijtimoiy tarmoqdagi sahifasida.

Hozirda Iliya Topuriya shaxsiy masalalar sabab janglardan qisqa tanaffus olgan. O'z navbatida, Getji — Pimblett jangi 25-yanvar, yakshanba kuni Las-Vegasda bo'lib o'tadigan UFC 324 turnirining markaziy to'qnashuvi sifatida belgilangan.