"Galatasaroy" yarim himoyachisi Ilkay Gyundogan sobiq jamoasi "Manchester Siti"ga qarshi o'yindan so'ng intervyu berdi.

Chempionlar ligasi umumiy bosqichining so'nggi turida "shaharliklar" o'z maydonida 2:0 hisobida g'alaba qozondi. Gollarga 11 va 29-daqiqalarda Erling Xoland hamda Rayan Sherki mualliflik qildi.

- "Etihad"ning kiyinish xonasida o'tirish biroz g'alati edi. Albatta, men uchun bu hayajonli oqshom. Alohida joy. Bu stadionda o'ynash har doim yoqimli. Ko'plab tanish chehralarni, muxlislarni ko'rdim - zo'r bo'ldi. Do'stim Bernardu Silva bilan futbolka almashdim. U bilan bog'liq ko'plab o'ziga xos xotiralarim bor. O'ylaymanki, u ham juda xursand bo'ldi," - deya Gyundoganning so'zlarini keltiradi City Report.

Germaniyalik futbolchi joriy mavsum avvalida "Manchester Siti" safini tark etdi.