FIFA prezidenti Janni Infantino Portugaliya terma jamoasi hujumchisi Krishtianu Ronalduning navbatdagi rekordiga izoh berdi.

Seshanba kuni 40 yoshli forvard Vengriyaga qarshi o'yinda (2:2) dubl qayd etdi. Endi Ronalduning hisobida jahon chempionati saralash bosqichidagi 41 ta gol bor - bu barcha davrlar uchun rekord.

"Barakalla, Krishtianu! 41 gol! Jahon chempionati saralashi tarixidagi eng yaxshi to'purar unvoni bilan tabriklayman. Buyuk futbolchining yana bir aql bovar qilmas rekordi," - deb yozdi Infantino ijtimoiy tarmoqda.

Ronaldu Portugaliya terma jamoasi safida jami 225 ta o'yinda 143 ta gol urgan. Futbolchining milliy terma jamoadagi debyuti 2003 yil avgust oyida bo'lib o'tgan.