Madridning «Atletiko» klubi bosh murabbiyi Diego Simeone jamoa darvozaboni Yan Oblak qachon jarohatidan forig' bo'lib, tarkibga qaytishi haqida ma'lumot berdi.

«U hozircha bizga qo'shilishga tayyor emas. Lekin buni juda xohlayapti; biz u bilan yaxshilab gaplashib oldik. U jamoa uchun juda muhim o'yinchi, biz unga muhtojmiz. Umid qilamizki, u seshanba kuni jamoa bilan mashg'ulotlarga kirishishga tayyor bo'ladi», — deya Simeonening so'zlarini keltirmoqda AS.

Eslatib o'tamiz, darvozabon La Liganing 28-turi doirasidagi «Xetafe»ga qarshi o'yin (1:0) oldidan mushaklarini cho'zib olgan edi.

Joriy mavsumda Oblak klub safida barcha musobaqalarda 37 ta uchrashuvda maydonga tushib, o'z darvozasidan 47 ta to'p olib chiqdi, shuningdek, bitta golli uzatmani amalga oshirdi.