“Arsenal” klubining ispaniyalik darvozaboni David Rayya bugun oqshom bo'lib o'tadigan UEFA Chempionlar Ligasi final bahsi oldidan musobaqa tarixidagi noyob natijalardan birini qayd etib ulgurdi. U Evropadagi eng nufuzli klublar turnirining bir mavsumida o'z darvozasi daxlsizligini 9 ta o'yinda saqlab qolgan tarixdagi to'rtinchi posbonga aylandi.

Bungacha EChLning bir mavsumida 9 ta “quruq o'yin” o'tkazish baxtiga faqatgina uch nafar darvozabon muyassar bo'lgan edi. Ushbu elita ro'yxatdan Santyago Kanisares (“Valensiya”, 2000/01), Keylor Navas (“Real Madrid”, 2015/16) va Eduar Mendi (“Chelsi”, 2020/21) joy olgan.

Agar ispaniyalik posbon bugungi hal qiluvchi bahsda “Pari Sen-Jermen” hujumchilarining zarbalarini bartaraf etib, darvozasidan to'p o'tkazib yubormasa, musobaqa rekordini yangilaydi. Bunday holatda Rayya Chempionlar Ligasi tarixida bir mavsumda 10 ta “quruq o'yin” o'tkazgan ilk golkiper sifatida mutlaq rekordchiga aylanadi.