Angliya terma jamoasi va "Manchester Yunayted"ning sobiq yarim himoyachisi Devid Bekxem portugaliyalik Krishtianu Ronaldu futbolchilik faoliyatini yakunlagach, nima bilan shug'ullanishi haqida fikr bildirdi.

"Murabbiy sifatida Ronalduni ko'rmayapman. Menimcha, u futbol klubi xo'jayini bo'lishni xohlaydi. Krishtianu uchun murabbiylikdan ham muhimroq narsalar bor. Bu dunyoni zabt etmoqchi bo'lgan odam," - deya angliyalikning so'zlarini keltiradi Tribal Football.

Ronaldu hozirda Saudiya Arabistonining "An-Nasr" klubi a'zosi hisoblanadi. 40 yoshli hujumchining klub bilan amaldagi mehnat shartnomasi 2027 yilning yozida o'z nihoyasiga etadi.