"Katta dubulg'a" turnirlarining olti karra g'olibi, jahonning sobiq birinchi raketkasi, germaniyalik tennischi Boris Bekker "Arsenal" va "Bavariya"ni Evropaning eng kuchli jamoalari deb hisoblaydi. Chempionlar ligasi umumiy bosqich 5-turidan o'rin olgan o'yinda londonliklar myunxenliklarni 3:1 hisobida mag'lub etdi.

"Menga har ikki jamoa o'ynaydigan futbol yoqadi! Menimcha, hozir bu Evropadagi eng yaxshi ikki jamoa," - deb yozdi Bekker ijtimoiy tarmoqdagi shaxsiy sahifasida.

Ayni paytda "Arsenal" 15 ochko bilan EChL turnir jadvalida yakka peshqadam bo'lib turibdi. Jamoa eng yaqin ta'qibchilari - "PSJ", "Bavariya", "Inter" va "Real"dan uch ochko oldinda.