«Arsenal»ning braziliyalik hujumchisi Gabriel Jezus jamoani tark etadi. Bu haqda Topskills Sports UK nashri xabar bermoqda.

Manba bergan ma'lumotlarga ko'ra, «kanonirlar» rahbariyati 28 yoshli futbolchining maoshi yuqoriligi sababli u bilan amaldagi mehnat shartnomasini uzaytirmaslikka qaror qilgan. Xabar qilinishicha, «Arsenal» tarkibida yaqin orada katta o'zgarishlar kutilmoqda.

Joriy mavsumda Jezus barcha musobaqalarda jami 21 ta o'yinda ishtirok etib, 5 ta gol urdi va 2 ta golli uzatmani o'z hisobiga yozdirib qo'ydi.

Gabriel Jezusning «Arsenal» bilan amaldagi shartnomasi 2027 yilning yoziga qadar mo'ljallangan. Transfermarkt mutaxassislari hujumchining transfer qiymatini 20 million evroga baholamoqda.