"Surxon" bosh murabbiyi Anvar G'ofurov Superliganing 15-turi doirasida bo'lib o'tgan "Qo'qon-1912"ga qarshi o'yin (1:0) borasida o'z fikrini bildirib o'tdi.

— Uchrashuv haqida fikrlaringiz?

— Avvalo, bugungi g'alaba bilan barcha muxlislarimizni tabriklayman. Har ikki jamoa uchun ham bu uchrashuv juda muhim edi, chunki ikkala jamoaga ham ochkolar zarur edi. Shu sababli maydonda kurashlarga boy va shiddatli o'yin kechdi. Raqibimiz ham uchrashuvga puxta tayyorgarlik ko'rganini namoyish etdi.

Futbolchilarimiz bugun bor kuch va imkoniyatlarini ishga solishdi. Ularning mehnati evaziga muhim uch ochkoni qo'lga kiritdik. Albatta, hali ustida ishlashimiz kerak bo'lgan jihatlar ko'p. Oldinda yanada yaxshiroq o'yin ko'rsatish uchun mehnat qilishda davom etamiz. Fursatdan foydalanib, jamoamizni qo'llab-quvvatlash uchun uzoq yo'l bosib kelgan barcha muxlislarimizga samimiy minnatdorchilik bildiraman.

— O'yindagi yagona gol muallifi Richard Fraydeyni almashtirishga nima sabab bo'ldi? U yaxshi o'yin namoyish etayotgan edi.

— Uchrashuv davomida maydondagi har bir futbolchining jismoniy holatini muntazam kuzatib boramiz. Richard ham o'z vazifasini yaxshi bajardi, biroq o'yinning o'sha pallasida biroz charchagani sezildi.

Gol o'tkazib yuborganidan keyin «Qo'qon-1912» jamoasi hujumkor o'yinga o'tdi va barcha kuchini oldinga tashladi. Biz esa qarshi hujumlardan unumli foydalanish va o'yin tempini saqlab qolish maqsadida yangi kuchlarni maydonga tushirdik. Shu sababli Richard Fraydeyni almashtirishga qaror qildik. Bu individual qarordan ko'ra, jamoaviy taktika va uchrashuvning borishidan kelib chiqqan qaror edi.

Manba: Stadion.uz