«Bornmut» bosh murabbiyi Andoni Iraola mavsum yakunida uning o'rnini egallaydigan Marko Rozening tayinlanishiga munosabat bildirib, unga o'z qo'llovini izhor qildi.

«O'ylaymanki, klub juda ishonchli qo'llarda bo'ladi. Bu — ajoyib murabbiy. Men uni bir necha yil oldin ham maqtagan edim. Uning jamoalari ko'rsatadigan o'yin menga doim yoqqan va umid qilamanki, bundan keyin ham shunday bo'lib qoladi», — dedi Iraola.

Shuningdek, ispaniyalik mutaxassis Marko Rozening salohiyati va tajribasiga yuqori baho berdi:

«U katta Evropa tajribasiga ega bo'lgan yaxshi murabbiy va uning istiqboli porloq. To'g'ri, u bilan shaxsan tanish emasman, lekin uning jamoalari uslubini doim kuzatib borganman».

Eslatib o'tamiz, avvalroq «Bornmut» mavsum yakunida klubni tark etadigan Iraolaning o'rniga Marko Roze bilan 3 yillik shartnoma imzolaganini rasman e'lon qilgan edi. Nemis mutaxassisi faoliyati davomida «Zaltsburg», «Borussiya M», «Borussiya D» va «RB Leyptsig» kabi jamoalarni boshqargan. Hozirda «Bornmut» APL turnir jadvalida 9-o'rinni egallab turibdi va o'z tarixida ilk bor evrokuboklarga yo'llanma olish uchun kurashmoqda.