Madridning "Real" klubi bosh murabbiyi Xabi Alonso jamoaning muammosi haqida fikr bildirdi. Yakshanba kuni "qaymoqranglilar" "Alaves"ni katta qiyinchiliklar evaziga mag'lub etishdi (2:1).

Uchrashuvning 24-daqiqasida Kilian Mbappe madridliklarni oldinga olib chiqqan bo'lsa, 68-daqiqada mezbonlar hisobni tenglashtirishga muvaffaq bo'ldi. Uchrashuv taqdirini Rodrigoning 76-daqiqadagi aniq zarbasi hal qildi.

Uchrashuv yakunlangach, jurnalistlar Alonsodan nega "Real" o'yinlar davomida diqqatini yo'qotib qo'yayotganini so'rashdi.

"Qo'shilmayman - o'yinlar har xil bo'ladi. Bu mavsumda shunday o'yinlar bo'ldiki, ular davomida biroz sekinlashdik, ammo so'nggi uchta o'yinda bunday holat kuzatilmadi," - deya Alonsoning so'zlarini keltiradi Madrid Universal.

"Real" La Liga turnir jadvalida 39 ochko bilan 2-o'rinda bormoqda. Peshqadamlik "Barselona"da (43).