25 dekabr kuni yosh hakamlar attestatsiyadan o'tkaziladi

Avval xabar berilganidek, O'zbekiston futbol assotsiatsiyasi yurtimizda hakamlikni rivojlantirish, hakamlar malakasini oshirish, ularning kasbga bo'lgan layoqatlarini sinovdan o'tkazish maqsadida, muntazam ravishda hakamalarni attestatsiyadan o'tkazib kelmoqda.   Shunga ko'ra, shu yilning 25 dekabr kuni Toshkent shahrida Respublikamizning barcha hududlaridan saralab olingan 40 nafardan ortiq yosh hakamlarni attestatsiyadan o'tkazish jarayoni bo'lib o'tadi. Attestatsiyada hakamlar jismoniy tayyorgarlik hamda futbol o'yini qoidalari bo'yicha sinovdan o'tadilar. Jismoniy testlar Toshkent shahridagi  Engil Atletika federatsiyasi yugurish yo'lakchasida o'tkazilsa, nazariy imtihonlar "Chig'atoy" sport majmuasida bo'lib o'tadi. Imtihonlar O'FA Hakamlar va nazoratchilar boshqarmasi tomonidan o'tkaziladi.    Sinovlardan muvaffaqiyatli o'tgan yosh hakamlar kelasi yilning yanvar oyida Pro-liga hakamlar uchun bo'lib o'tadigan o'quv-mashg'ulot yig'iniga taklif etiladi.