Jahon bo'yicha – Mbappe, bizda – Odil
/ Kiritdi: BestMaster Ko'rilgan: 581
Jahonga mashhur transfermarkt.de sayti futbolchilarning transfer narxlarini aniqlashi bilan nom qozongan.
To'g'ri, har doim ham ushbu saytda ko'rsatilgan narx futbolchining haqiqiy bahosini keltirib chiqarmaydi. Lekin sayt xodimlari o'yinchilarning turli jihatlarini inobatga olgan holda o'z narxlarini belgilashadi. Shuningdek, saytda tez-tez futbolchilarning narxi o'zgarib turadi.
Xullas, saytda terma jamoalar o'yinchilarining narxlari belgilab boriladi. Jahonning kuchli ligalarida har bir o'yinchiga e'tibor qaratilsa, futboli unchalik rivojlanmagan mamlakatlarda asosan xalqaro o'yinlarda o'ynaydigan futbolchilarga narx belgilashadi. O'zbekistonlik o'yinchilar bilan ham shunday desa bo'ladi.
Alohida futbolchilarni oladigan bo'lsak, bugungi kunda «PSJ» hujumchisi Kilian Mbappe eng qimmat bo'lib turibdi. Transfermarkt ushbu futbolchini 200 million evroga baholagan. Ikkinchi o'rindan ham «PSJ» futbolchisi joy olgan - Neymar. Uning bahosi 180 millionga teng. Vaholanki, amalda Neymar 222 million evroga sotilib, jahonning eng qimmat futbolchisi bo'lib turibdi. Uchinchi o'rindagi Lionel Messi esa 160 millionga baholangan. Keyingi o'rinda 150 milliondan narxlangan Muhammad Saloh, Garri Keyn, Eden Azar va Kevin de Bryuynelar borishmoqda. Krishtianu Ronaldu esa 100 million evroga baholanib, 16-o'rinni egallab turibdi.
Klublar borasida olsak, «Barselona» eng qimmati. Bugungi kunda ushbu jamoa safida o'ynayotgan futbolchilar 1,18 milliard evroga baholangan. «Manchester Siti» futbolchilarining narxi esa 1,14 milliardga teng. 965,3 million evroga baholangan «Real» kuchli uchlikni yakunlab beradi.
Terma jamoalar orasida Frantsiya eng qimmat bo'lib turibdi. Hozirda jahon chempionlari 1,23 milliard evroga baholanishgan. Angliya 1,06 milliard bo'lsa, Germaniya terma jamoasining umumiy bahosi 1,02 milliardga teng. Braziliya termasi esa 1,01 milliard evroni tashkil qilmoqda. Qolgan jamoalar milliardlik marrani zabt eta olishmagan. Eng yaqin kelgan jamoa Ispaniyadir - 881 million evro.
O'zbekiston terma jamoasi futbolchilari 21,45 million evroga baholangan. Har bir futbolchining o'rtacha narxi 933 ming evroni tashkil qiladi. Terma jamoamizdagi eng qimmat futbolchi bu Odil Ahmedovdir. Ayni payt Xitoyning «Shanxay SIPG» jamoasi sharafini himoya qilayotgan hamyurtimiz 6 million evroga baholangan. Keyingi o'rindagi Jaloliddin Masharipovning narxi 1,4 million.
Pozitsiyalar bo'yicha oladigan bo'lsak, yarim himoyachilarimizning o'rtacha narxi 1,53 million evroni tashkil qiladi. Albatta, bunda Odil Ahmedovning hissasi katta. Hujumchilarimiz esa o'rtacha 1,12 millionga baholanishgan.
Umumiy olib qaraganda, o'rtadagi tafovut katta. Agar transfermarkt begilagan narxda futbolchi sotib olinadigan bo'lsa, birgina Kilian Mbappening narxiga deyarli o'nta O'zbekiston terma jamoasini xarid qilsa bo'ladi. Lekin yuqoridagi aytganimizdek, bu futbolchilarning haqiqiy narxi emas. Klublar o'rtasidagi oldi-sotdilarda bu narxlar unchalik rol o'ynamaydi.
O'zbekiston terma jamoasi
futbolchilarining narxlari(evroda)
Darvozabonlar:
Sanjar Quvvatov «Paxtakor» 500 ming
Akbar To'raev AGMK 300 ming
Javohir Ilyosov «Lokomotiv» 300 ming
Himoyachilar:
Islom To'xtaxo'jaev «Lokomotiv» 800 ming
Davron Hoshimov «Lokomotiv» 500 ming
Egor Krimets «Paxtakor» 350 ming
Dostonbek Tursunov «Renofa Yamaguchi» 300 ming
Anzur Ismoilov «Lokomotiv» 300 ming
Oleg Zoteev «Lokomotiv» 750 ming
Farrux Sayfiev «Paxtakor» 600 ming
Akmal Shorahmedov AGMK 450 ming
Yarim himoyachilar:
Odil Ahmedov «Shanxay SIPG» 6 million
Ikromjon Aliboev «Seul» 900 ming
Fozil Musaev «Jubilo Ivata» 600 ming
Sardor Mirzaev «Lokomotiv» 1,5 million
Javohir Siddiqov «Paxtakor» 600 ming
Odil Hamrobekov «Paxtakor» 600 ming
Otabek Shukurov «Sharja» 500 ming
Jaloliddin Masharipov «Paxtakor» 1,4 million
Dostonbek Hamdamov «Paxtakor» 800 ming
Hujumchilar:
Temurxo'ja Abduxoliqov «Lokomotiv» 1,2 million
Marat Bikmaev «Paxtakor» 1,2 million
Eldor Shomurodov «Rostov» 1 million
Amplua bo'yicha
Pozitsiya Umumumiy narxi O'rtacha
Darvozabonlar 1,10 mln. 367 ming
Himoyachilar 4,05 mln. 506 ming
Yarim himoyachilar 10,70 mln. 1,53 million
Hujumchilar 5,60 mln. 1,12 million