Fazliddin G'oibnazarovning navbatdagi jangi 18 yanvar kuni o'tkaziladi

Professional boksning super engil (63,5 kg) vazn toifasida ringga ko'tarilayotgan o'zbekistonlik bokschi Fazliddin G'oibnazarovning ettinchi jangi 2019 yil 18 yanvar kuni o'tkazilishi belgilandi.

Bokschining ma'lum qilishicha, G'oibnazarovga ettinchi jangida Dominikan Respublikasi vakili Rikardo Garsiya raqiblik qiladi. 8 raundga mo'ljallangan mazkur jang AQShning Viskonsin shtati, Verona shahrida joylashgan "Turning Stone Resort & Casino" sport saroyida bo'lib o'tadi.

32 yoshli Rikardo Garsiya shu kunga qadar professional boksda 19 ta jang o'tkazgan bo'lib, ularning 14 tasida g'alaba (9 nokaut) qozongan, 1 durang va 4 mag'lubiyat qayd etgan.

Fazliddin G'oibnazarov esa professional boksda 6 ta jang o'tkazib, ularning barchasida raqiblarini mag'lubiyatga uchratgan. Uchta jangni muddatidan oldin o'z foydasiga hal qilgan.