Baxtiyor Ashurmatov: Raqib bugun haqli ravishda g'alaba qozondi

“Metallurg” – “Buxoro” uchrashuvidan so'ng mehmonlar ustozi Baxtiyor Ashurmatov quyidagicha fikr bildirdi: 

- Jamoamiz bugun yomon o'yin ko'rsatmadi. Biroq o'z darvozamizdan gol o'tkazib yuborgach, o'z o'yinimizni topib olishda qiynaldik. “Metallurg” safida mahoratli futbolchilar ko'p ekanligi bugungi o'yinni aynan bekobodliklar foydasiga hal bo'lishiga sabab bo'ldi.

“Metallurg” klubi haqli tarzda g'alabaga ega chiqqanini ayta olaman. Bugungi bahs bizga hali ayrim jihatlar ustida ko'p ishlashimiz lozim ekanini ko'rsatib berdi. Zero AGMKga qarshi o'yindan so'ng yigitlarda ancha ishonch paydo bo'lgan edi.

Lekin bugun bir qator jihatlar ustida hali ishlashimiz lozim ekanini bilib oldik. Yana shuni ayta olamanki, bugun bizni bevosita stadiondan qo'llab-quvvatlash uchun bir qator buxorolik ishqibozlar tashrif buyurishgan edi. Yigitlarimiz aynan shu muxlislar uchun ham yaxshi o'yin namoyish etib berishi lozim edi. Lekin endi kelgusi o'yinlarda muxlislarimizni xushnud etish uchun urinamiz, - dedi murabbiy.